Øll fara til Týsklands í januar 2024

Manslandsdystur í hondbólti EM-undanbólkur 4
Eysturríki - Føroyar 38-33 (24-16)

Sunnudagin 30. apríl 2023 varð føroysk ítróttasøga skrivað, tá ið størsta bragdið í føroyskum liðítrótti gjørdist veruleiki.

Føroyar hava fyri fyrstu ferð spælt seg til eitt endaspæl í einum liðítrótti fyri vaksin. Føroysku hondbóltsmenninir megnaðu tað ótrúliga, og í januar 2024 seti eg kós móti Týsklandi saman við hundraðtals kanska túsundtals føroyingum, sum fara at stuðla okkara hondbóltshetjum.

Tað er torført at vita, hvat eg skal skriva eftir eitt slíkt bragd, og eg sat faktiskt og græt av gleði í sofuni, tá ið tað var greitt, at okkara dreingir høvdu klárað tað.

Brádliga vóru álvarsom andlitsbrá í sjónvarpsstovuni. Ein danskari hevði roknað seg fram til okkurt heilt annað. Men tíbetur so er danskarar ikki til at líta á 🤪, og ein av drívmegunum í hondbóltssambandinum, Hallur Danielsen, kundi vátta, at vit eru við í EM-lutakastinum, sum verður 10. mei.

Stig móti Eysturríki tryggjar EM-endaspælið

Tað er púra greitt, at ein javnleikur ella sigur móti Eysturríki tryggjar føroysku hondbóltsmonnunum at koma til EM-endaspælið í Týsklandi í januar 2024.

Tapa vit móti Eysturríki, er støðan hinvegin sera torskild, og vit kunnu enda við at standa eftir við svartaper í undanbólki 4.

Her er ein roynd at greiða frá torskildu støðuni

(fyrivarni verður tikið fyri feilum tí hetta er torskilt)

Bukaðu Ukraina - EM-dreymurin livir enn

Manslandsdystur í hondbólti EM-undanbólkur 4

Føroyar - Ukraina 33-26 (17-12)
Manslandsliðið í hondbólti greiddi sína uppgávu. Teir greiddu hana enntá væl og virðiliga, tá ið teir í vunnu greiðan 33-26 sigur móti Ukraina. 

Føroyar vóru betri enn Ukraina allan dystin, og við einum Eliasi á Skipagøtu í heimsflokki og einum sera væl uppløgdu Paula Jacobsen í málinum, gjørdist sigurin rímiliga tryggur.

Harvið er triðja plássið í bólkinum nærum tryggjað, og so er spurningurin bara, hvar vit enda, tá ið  støðan millum nummar 3 úr øllum bólkunum skal gerast upp. Tað ber eisini til at náa øðrum plássinum, um alt lagar seg.

Mest týðandi dystur í føroyskari ítróttasøgu

Manslandsdystur í hondbólti EM-undanbólkur 4, í høllini á Hálsi kl. 19.00 26. apríl 2023
Føroyar - Ukraina

Í kvøld verður mest týðandi dystur í føroyskari ítróttasøgu spældur í høllini á Hálsi í Havn, tá ið manslandsliðið í hondbólti kann taka eitt avgerandi fet móti EM-endaspælinum í Týsklandi í januar 2024.

Dysturin er móti Ukraina, og júst Føroyar og Ukraina kappast um triðja plássið í EM-undanbólki 4. Hetta triðja plássið kann geva pláss í EM-endaspælinum.Atgongumerkini til dystin vóru seld eftir lítlari løtu, og høllin á Hálsi verður sostatt fullsett í kvøld.

Sleptu hondbremsuni í seinna hálvleiki

EM-undanbólkur 2 hjá kvinnum:

Føroyar - Danmark 19-39 (5-18)
Vit vistu, at mótstøðan hjá okkara hondbóltskvinnum var sera sterk, nú donsku hondbóltskvinnurnar vitjaðu í høllini á Hálsi. Vónirnar vóru tó til staðar, at vit fóru at geva mótstøðuliðnum ein lítlan hvøkk.

Men tað gjørdist ongantíð spenningur um nakað sum helst. Munurin á góðskuni á liðunum, var heilt einfalt risa stórur, og tá ið hvørki okkara kvinnur ella spæliætlanin tyktist klár at spæla móti danska landsliðnum, so var einki at gera.

Gandurin hjá Eliasi var ikki nokk

EM-undandystur hjá monnum: Føroyar – Ukreina 25-26 (11-16)

Føroysku hondbóltsmenninir vóru enn einaferð akkurát ov stuttir av vinna ein undandyst. Ein vánalig løtu í fyrra hálvleiki kostaði sigurin, og so hjálpti ikki, at úrmælingurin, Elias á Skipagøtu kom á vøllin og veruliga vísti hondbóltsgand á hægsta altjóða stigi.

Eitt lítið fet rætta vegin

Stutt samanumtøka av HM-undandystunum hjá manslandsliðnum í hondbólti
Føroysku menninir vóru ikki heilt klárir fyrsta dystin móti Litava, og tað varð revsað. Annar dysturin móti Slovakia var heilt klárt besta føroyska avrikið, hóast vit taptu við einum máli. Seinasti dysturin móti Luksemborg var ein sera vánaligt spældur hondbóltsdystur, men vit fingu víst, at Føroyar hevur tikið seg fram um Luksemborg seinnu árini, og fyri fyrstu ferð vunnu Føroyar ein HM-undandyst.

Skermmynd frá kvf.fo