B36 sendi KÍ norður við ongum

Betri Deildin Menn: B36 - KÍ 2-0 (0-0)

Annar oddadysturin í øðrum umfari, var í Gundadali í kvøld, tá ið B36 tók móti KÍ. Dysturin var ikki serliga væl spældur og lítið av samanhangandi spæli var at síggja.

Í fyrri hálvleiki høvdu bæði liðini onkran rímiligan møguleika. Hinvegin var sera langt millum snapsarnar í seinna hálvleiki, og tá ið Anton Søjberg Horup legði B36 fram um tíggju minuttir fyri tíð, var talan um fyrsta veruliga møguleikan eftir steðgin.

Í yvirtíðini økti sami Anton Søberg Horup til 2-0, og so vóru meistararnir sendir aftur til Klaksvíkar við ongum.

Víkingur setir kós móti meistaraheitinum

Betri Deildin Menn: Víkingur – HB 2-1 (1-0)
Víkingur var betri enn HB í fyrra hálvleiki og førdi 1-0 í steðginum við málið frá Geza Turi. HB kom betri við fyrst í seinna hálvleiki. Men tað var Finnur Justinussen hjá Víkingi, sum økti til 2-0, og dysturin tyktist avgjørdur.

HB svaraði tó aftur, tá ið eitt stórt korter var eftir, og seinastu løtuna var spenningur í dystinum. Víkingur helt tó tørn og vann ein uppibornan sigur.

Oddaliðini deildu stigini


Burn Deildin: H71 - VÍF 32-32 (19-14)
Heilt fitt av áskoðarum vóru í høllini í Hoyvík og hugdu, tá ið oddaliðini í bestu mansdeildini í hondbólti, H71 og VÍF, spældu javnleik 32-32.

Í hálvleikinum var H71 frammanfyri 19-14, men VÍF át seg spakuliga inn í dystin aftur, og við einum brotskasti í seinastu løtu javnaði VÍF.

Enn ein lættur sigur á Luksemborg


EM-undanbólkur 7: Føroyar - Luksemborg 39-21 (17-9)
Sum væntað, vunnu føroysku hondbóltskvinnurnar eisini seinna dystin móti Luksemborg heima í høllini á Hálsi lættliga.

Føroyar fóru frá beinanvegin, og hóast Luksemborg í dag gjørdi ein roynd at hanga í, so var so mikið stórur munur í góðskuni á liðunum báðum, at tað einasta møguliga úrslitið var ein føroyskur stórsigur.

Føroyar vunnu dysitn at enda 39-21 móti einum sera vánaligum landsliðið úr Luksemborg.

Hondbóltskvinnurinar vunnu lættliga á Luksemborg



EM-undanbólkur 7: Luksemborg - Føroyar 16-34 (9-18)
Føroyar livdu upp til leiklutin sum stórfavorittar og høvdu als ongar trupulleikar at vinna á Luksemborg.

At byrja við var eitt sindur av fjáltri á føroyska spælinum. Men Føroyar komu beinanvegin fram um við nøkrum málum og øktu munin spakuliga allan dystin. Eftir hálvleiksstøðuna 18-9 til Føroyar, gjørdist úrslitið 34-16 til Føroyar.

Vestmenningar steypavinnarar

 
Steypafinala í Faxe Kondi kappingini fyri menn
VÍF - Neistin 31-23 (17-12)

VÍF lat ongan iva vera um úrslitið í steypafinaluni móti Neistanum. Liðið hjá VÍF var heilt einfalt betri enn Neistin, sum ikki hevði líka nógvar streingir at spæla upp á.

Stóra hetjan hjá VÍF var ungi málverjin Brandur Silvurstein, sum veruliga traðkaði til, tá ið Mladen ikki hevði ein av sínum bestu dystum

Filip Jojic hevði eisini stillað kanónina rætt inn, og kviki sprellimaðurin, Tróndur Johnsson var ein støðug hóttan móti Neistaverjuni.

Turið og Kyndil vunnu steypið

Steypafinala í Faxe Kondi kappingini fyri kvinnur
Kyndil - Neistin 29-21 (12-7)

Turið Arge var stórspælandi, tá ið royndu Kyndilskvinnurnar vunnu greitt á unga Neistaliðnum í steypafinaluni.

Turið setti dagsskránna frá byrjan og helt støðið allan dystin. 15 mál hevði hon skotið, tá ið dómarin floytaði av, og spurningurin er, um tað er hent áður í eini steypafinalu.

Kyndil var betri enn Neistin á flestu økjum, og er uppiborið steypavinnari hjá kvinnum 2024

EM24: “Vit eru við fyri at vinna”



Hugleiðing
Í flogfarinum á veg heim úr Berlin mikudagin hoyrdist ein barnarødd syngja “Óli, Óli Óli, Óli Mittún”. Fitti sangurin var eitt ekkó frá einari framúr góðari hondbóltsviku í Berlin.

Eins og barni, sum sang um Óla, so eri eg ikki ordiliga lendur enn. Okkara hondbóltshetjur fingu okkum so høgt upp at flúgva, at tað er torført at koma niður aftur.

EM24: Leikaramet - Tveir leikarar í heimsflokki


Fleiri føroyskir leikarar spældu sera væl í verjupartinum móti Noreg
Ítróttur og rørsla gevur okkara hondbóltshetjum leikaramet fyri teirra samlaða avrik í teimum trimum dystunum í EM-endaspælinum í Týsklandi. Serliga tveir leikarar skaraðu framúr.

EHF hevur savnað øll hagtølini fyri hvønn einstakan leikara í hesum PDF-inum

Leikarametini verða givin eftir somu treytum, sum Kringvarp Føroya brúkti.
- 5 stjørnur vera givnar fyri ”einastandandi gott avrik”
- 4 stjørnur vera givnar fyri ”gott avrik”
- 3 stjørnur vera givnar fyri ”miðal avrik”
- 2 stjørnur vera givnar fyri ”ikki nøktandi avrik”
- 1 stjørna verður givin fyri ”sera vánaligt avrik”

EM24: Takk fyri dreingir


Mynd úr myndarøð á jn.fo
EM-dystur í bólki D: Pólland - Føroyar 32-28 (15-15)
í Mercedes Benz Arena í Berlin, mánadagin 15. januar kl. 17.00 føroyska tíð.

Føroyar fylgdu við Póllandi í 50 minuttir í seinasta EM-dystinum á hesum sinni. So rakk ikki longri, og vit taptu dystin 32-28. Vit mugu ásanna, at trøini ikki vaksa upp í himmalin, hóast hendan vikan í Berlin hevur verið ótrúlig.

Hesir røsku hondbóltsdreingirnir hava givið okkum eina søgu, sum vit ongantíð gloyma aftur. Bara tað at spæla seg í eitt endaspæl var veruleikafjart, og tá ið vit tóku stig frá Noregi, ja, ta løtuna vóru vit so høgt uppi, at ringt var at koma niður aftur.

Hóast ósigurin í gjárkvøldið, var lagið gott, og hondbóltsveitslan helt fram alla náttina í Berlin.

EM24: Tað eigur ikki at bera til - Ella?


EM-dystur í bólki D: Pólland - Føroyar
í Mercedes Benz Arena í Berlin, mánadagin 15. januar kl. 17.00 føroyska tíð.

Vit skulu vinna á Póllandi, og Noreg skal tapa fyri Slovenia. Harafturat skulu vit hála 14 mál inn á Noreg í samlaða málmuninum, um vit skulu víðari í EM-kappingini. Tað eigur ikki at bera til. Men okkara menn kunnu gera sítt til at varðveita spenningin við at vinna móti Póllandi við nógvum málum. Noreg og Slovenia spæla ikki fyrr enn aftaná.

Dagført landsliðsleikarayvirlit
Dysturin á heimasíðuni hjá EHF
Beinleiðis dystargongd
Føroyar á heimasíðuni hjá EHF

Føroyar verða mettar at vera favorittar í seinasta dystinum móti Póllandi í EM-bólki D í dag klokkan 17 føroyska tíð. Men vit muga minnast, at tað ikki altíð er lætt at vera favorittur, og harafturat vil Pólland sjálvandi bjarga æruni, eftir at hava tapt teir báðar fyrstu dystirnar.

Pólland er eisini eitt gott landslið, hóast teir ikki hava spælt serliga væl hesa kappingina. Móti Slovenia vóru teir milt sagt vánaligir, og spæla teir á tí støðinum, so ber til at vinna við nógvum mál. Men sum nevnt, tað er ikki lætt at vera favorittur.

Um Føroyar ikki vinna við nógvum málum, so hevur tað kortini týdning at vinna, tí ein sigur móti Póllandi kann gera, at Føroyar verða styrkismettir hægri til lutakastið til HM-undanbólkarnar.  

Annars gongur lívið sína gongd her í Berlin. Nógvir føroyingar tóku sær av løttum í gjár, eftir veitsluna leygarkvøldið.

Í morgun hoyrast ýlandi traktorar um alt Berlin, tí bøndur og onnur mótmæla ætlaðum sparingum í stuðli til bøndurnar. Serliga í økinum kring Brandenburger Tor leggur tú merki til mótmælini, sum tykjast at vara frá morgni til myrkurs hvønn einasta dag.

Í dag manna vit okkum upp aftur. Seinnapartin verður upphitingartiltak, og klokkan 18 lokala tíð fara vit fyri seinastu ferð í hesum EM-endaspælinum at heppa á okkara dreingir. Ella, man tað ómøguliga bera til?

Aðrar greinar
EM24: Føroyar í heimsflokki og ekstasa í Berlin
EM24: Føroyingar streyma til Berlin úr øllum ættum
EM24: Hasum kunnu tit vera stoltir av
EM24 - Søguligur spenningur í Berlin


EM24: Føroyar í heimsflokki og ekstasa í Berlin


Mynd úr myndarøð á jn.fo.
EM-dystur í bólki D: Føroyar - Noreg 26-26 (12-13)
í Mercedes Benz Arena í Berlin, leygardagin 13. januar kl. 19.30 føroyska tíð.

Berlin er ein týðandi býur í evropeiskari søgu, og hóast føroyska søgan, sum var skrivað í Berlin leygarkvøldið 13. januar 2024 neyvan fer at standa í søguni hjá Berlin, so fer hetta kvøldið at standa rimmar fast í føroyskari ítróttasøgu.

Okkara hondbóltsgarpar høvdu framt tað risastóra bragd at spæla javnt í EM-dysti móti ongum minni enn Noregi.

Við einum frálíkum avriki eydnaðist at fylgja við Noregi nærum allan dystin. Men tá ið Noreg førdi við trimum og hálvurannar minuttur var eftir, sá einki út.

Tað eydnaðist tó upp á onkran máta at koma aftur í aftur, og tá ið Elias á Skipagøtu í seinastu sekundunum javnaði til 26-26 við brotskasti, vóru allir føroyingar í Berlin í fullkomnari ekstasu.

EM24: Føroyingar streyma til Berlin úr øllum ættum


EM-dystur í bólki D: Føroyar - Noreg
í Mercedes Benz Arena í Berlin, leygardagin 13. januar kl. 19.30 føroyska tíð.


Í dag verður aftur ein stórur dagur í føroyskari hondbóltssøgu, og tað væntast, at enn fleiri føroyskir áskoðarar vera til dystin, tí føroyingar streyma til Berlin úr øllum ættum. Eitt flogfar er komið úr Føroyum í morgun, og føroyingar, sum búgva ymsa staðni í Evropa hava eisini lagt leiðina til týska høvuðsstaðin.

Tað tykist, sum føroyingar ynskja at uppliva hetta heilt serliga huglagið, sum er uppstaðið í Berlin, har túsundtals føroyingar hyggja eftir hondbólti og síðan hittast á “Hotel Park Inn”, sum í hesum døgum eisini gongur undir nøvunum “Oyrasundskolegiið” og “Hotel Føroyar”.

EM24: Hasum kunnu tit vera stoltir av

(Mynd úr myndafrásøgn á jn.fo)

EM-dystur í bólki D: Slovenia – Føroyar 32-29 (13-13)
í Mercedes Benz Arena í Berlin, hósdagin 11. januar kl. 17.00 føroyska tíð.

Tað var ógvuliga nær við, at føroysku hondbóltsmenninir megnaðu at taka stig frá Slovenia. Hevði bara okkurt koppað okkara veg, so kundu vit staðið eftir við einum stigi ella tveimum. Høvdu vit skorað upp á onkran av brendu møguleikunum í fyrra hálvleiki, høvdu málverjarnir tikið eitt skot afturat, ella hevði onkur dómaraavgerð fallið okkara veg. Ja, so hevði ein frálíkur dagur verið upp aftur betri.

Føroysku áskoðararnir áttu høllina hetta kvøldið í Berlin. 5000 føroyingar sungu tjóðsangin so hart, sum hann neyvan er sungin áður, og hóast vit taptu, so helt rómurin fram allan dystin og eina góða løtu eftir dystin. Eg havi ongantíð í lívinum verið millum so lívligar og rópandi áskoðarar.

EM24 - Søguligur spenningur í Berlin



Í dag verður føroysk ítróttasøga skrivað, og her í Berlin er spenningurin í hásæti. Í miðbýnum kring Alexanderplatz búgva nógvir føroyingar á hvørjum einasta gistingarhúsi. Á einum búgva heili 1500 føroyingar. 

Handlarnir í Berlin hava eisini eyka góðar dagar, og í H&M munnu tey hava serliga góðar dagar, tí har er bara føroyskt at hoyra

Her er alt slag av føroyingum. Teir, sum hava áhuga fyri hondbólti, og teir sum ikki hava áhuga fyri hondbólti.

Heilt nógvir politikkarar eru her, eisini onkrir, sum valla hava verið í eini hondbóltshøll fyrr. So kunnu teir taka tað heilt røttu sjálvsmyndina at deila á sosialum miðlum, meðan vit eina løtu gloyma alt um CO2-útlát.

Í gjárkvøldið vóru vit nakrir føroyskir Liverpool-fjepparar á eini ítróttabarr og sóu Liverpool vinna á Fulham. Barrin var fullsett við ungum føroyingum í sera góðum lagi. Teir sungu føroyskar sangir og sluppu eisini at yvirtaka annleggið á barrini. Millum annað rungaði nýggi slagsangurin hjá Benjamin Rajani fleiri ferðir í hátalarunum, meðan føroyingarnir sungu um kapp við harða ljóðið.

Frá sjálvum hondbóltslandsliðnum frætta vit ikki so nógv, har vita tit, sum eru heima í Føroyum helst meira enn vit. Tó so, okkurt er at frætta frá onkrum, sum hevur samband inn í hópin, og tey sum eru hondbóltsáhugaði tosa og gita óført um, hvør ferð at spæla, og hvussu leikætlanin man fara at verða.

Um eina løtu fara føroyingar at møtast í eini rimmar stórari høll. Haðani verður kl. 17.00 gingið móti Mercedes Benz Arena, har eini 4000-5000 føroyingar væntast at verða í høllini, sum hevur pláss til 14.800 áskoðarar.

Vit gleða okkum til ein søguligan dag í føroyskum ítrótti.

----------------

Dysturin á heimasíðuni hjá EHF
https://ehfeuro.eurohandball.com/men/2024/matches/details/202411010101020/slovenia-faroe-islands/

Beinleiðis dystargongd:
https://ticker.ehf.eu/v3/202411010101020

Føroyar á heimasíðuni hjá EHF:
https://ehfeuro.eurohandball.com/men/2024/teams/details/Q-KvsZwwZ4bbo3Fo32o0iw/faroe-islands/


Á myndini niðanfyri leggja tveir av føroysku lyklaleikarunum, Hákun Vest av Teigum og Peter Krogh ætlanir fyri dystin. Myndina hevur jn.fo tikið. Fleiri myndir síggjast á jn.fo.







Zagallo deyður 92 ára gamal

Zagallo við HM-steypum
Zagallo saman við Pelé

Fyrrverandi brasilski landsliðsleikarin og landsliðsvenjarin Mário Zagallo er deyður 92 ára gamal.

Hann var tann fyrsti, sum vann heimsmeistaraheitið bæði sum spælari og venjari. Hinir eru týskarin Franz Beckenbauer og fraklendingurin Didier Deschamps.

Sum spælari vann Zagallo HM í 1958 og 1962 millum annað saman við Pelé og Garrincha. Hann spældi vinstri álopsvongur í sera álopssinnaðu 2-4-4 spælskipanini. Hann var lítil á vøkstri, hevði frálíkan bóltførleika og arbeiddi eisini hart í verjupartinum. Hann kundi eisini spæla sum áleypari.

Í 1970 vandi hann landsliðið hjá Brasil, sum vann HM. Tað liðið verður ofta umtalað sum “heimsins besta fótbóltslið” við frægum leikarum sum Pelé, Jairzinho and Carlos Alberto.

Zagallo var eisini venjari hjá brasilsku liðunum, sum vunnu silvur í 1974 og aftur í 1998. Eisini var hann hjálparvenjari hjá Carlos Alberto Parreira, tá ið Brasil vann HM í 1994. Eisini vandi hann fleiri lið í Brasil.

Zagallo er tann seinasti av heimsmeistarunum frá 1958, sum var á livi.


EM24: Hondbóltsfepur á Hálsi undan EM


Venjingarlandsdystur í manshondbólti í høllini á Hálsi 
Føroyar - Belgia 41-31 (19-16)
Tað merkist, at nakað serligt fer at henda í næstu viku. 1800 áskoðarar til ein venjingardyst. Tað er ikki gerandiskostur, og vit kunnu staðfesta, at Føroyar gleða seg til EM-endaspælið í Týsklandi.

Dysturin sjálvur var, sum ein venjingardystur eigur at vera. Hvørki av liðunum løgdu serliga nógv fyri. Men vit fingu staðfest, at Føroyar eru vorðin ein betri hondbóltstjóð enn Belgia. Og vit sóu eisini okkurt nýtt í spælinum.

EM24: Berlin ein fjølbroyttur býur


Berlin Mitte (mynd:Wikipedia)
Eitt sindur um søguliga og dagsins Berlin

Frá 9. januar og eina góða viku fram verður týski høvuðsstaðurin Berlin vertur fyri eina ta størstu føroysku fólkmongdina, sum nakrantíð er savnað uttanlands. Tá verða nakrir túsund føroyskir hondbóltsáskoðarar í Berlin og stuðla manslandsliðnum í hondbólti í EM-endaspælinum.

Vit, sum eru nóg gomul, minnast, at Berlinmúrurin var ímyndin upp á kalda kríggið, sum setti stórar politiskar kílar millum Vestur- og Eysturevropa frá 1945, tá ið seinni veraldarbardagi endaði, fram til 1989.

Eftir í minninum stendur serliga myndin, tá ið íbúgvarnir í Berlin nærum við berum nevum knústu múrin niður eitt hóskvøld í novembur 1989. Men søgan um Berlin er nógv meira enn kalda kríggið og múrurin.

EM24: Gjøgnumgongd av landsliðshópinum

Mynd: hsf.fo
Landsliðsvenjarin Peter Bredsdorff-Larsen hevur valt sínar 19 mans út til EM-hópin, sum í januar skal til Týsklands at spæla EM-endaspæl í manshondbólti.

Í greinini er leikarayvirlit og gjøgnumgongd av hvørjum einstakum leikara.

EM24: Tríggir dystir í risastórari høll


Mynd: Harald Bjørgvin

Hin 9. januar fer føroyska manslandsliðið í hondbólti á eina søguliga ferð. Tá flúgva teir til týska høvuðsstaðin Berlin, har teir, sum fyrsta føroyska landsliðið nakrantíð skal spæla í einum veruligum endaspæli.

Vónandi verður VÍF skjótt aftur í Evropa

EHF European Cup: VÍF - SSV Brixen (Italia) 37-38 (19-17)
(Samanlagt 72-75, og Brixen ferð víðari)

Leingi livdi vónin at koma víðari, og tá ið níggju minuttir vóru eftir, stóð samanlagt á jøvnum. Seinastu minuttirnar kom italska liðið fram um, og VÍF kláraði ikki at svara aftur.

Hóast VÍF er úti úr evropeiskum hondbólti fyri hesaferð, so kunnu vestmenningar sum heild verða nøgdir við avrikið. Fyrst at spæla seg víðari niðri í Luksemborg, og so at spæla væl upp við eitt væl leikandi italskt lið, tað er í lagi.

Tað rakk ikki hesaferð. Men vónandi verður VÍF við aftur í Evropa komandi kappingarár.

Vónin hjá VÍF livur enn

EHF European Cup: SSV Brixen (Italia) - VÍF 37-35 (
17-18)
Sum vestmenningur var gott at vera aftur til evropeiskan hondbólt í Vestmanna, nú VÍF fyri fyrstu ferð síðan 1999 spældi evropeiskan hondbólt á heimavølli.

Heilt fitt av áskoðarum sóu VÍF vera frammanfyri tað mesta av fyrra hálvleiki. Munurin var tó ikki stórur, og í steðginum var VÍF frammanfyri 18-17.

Í seinna hálvleiki fóru italsku gestirnir, SSV Brixen frá VÍF, og eitt skifti vóru fimm mál á muni. Móti endanum av dystinum eydnaðist tó við einari ágangandi verju at hála tvey mál inn aftur, og dysturin endaði 37-35.

Hjá VÍF var Filip Jojic heilt stóri leikarin, og hann skoraði heili 17 mál

EM24: .... then we take Berlin

Um tekstin í kenda sanginum, “First we take Manhattan”, hevur Leonard Cohen sagt, at tað er ein sangur um yvirgang.

- Tað er nakað við yvirgangi, sum eg altíð havi hámett. Tann veruleikin, at tað eru ongar undanførslur ella eingi kompromi”.

Andin í sanginum kann førast yvir á okkara hondbóltshetjur. Teir hava framt eitt slag av yvirgangi í hondbóltsheiminum, uttan undanførslur og uttan kompromi, og nú eru teir klárir at taka Berlin.

Tá ið Cohen skrivaði sangin í 1987, var Berlin deildur í tvey við einum múri millum Eystur- og Vesturberlin. Nú er Berlin høvuðsstaður fyri sameinda týska ríkið, og býurin er klárur at taka móti føroyska landsliðnum og túsundtals føroyskum viðhaldsfólkum.

Nú tað stundar til størstu løtuna í føroyskari ítróttasøgu, fara Ítróttur og rørsla komandi vikurnar at skriva fleiri greinar um landsliðið, EM-endaspælið, og býin Berlin.

Hondbóltsføroyar gleða seg sum smábørn til jóla til EM-endaspælið í januar.

Góðkent avrik móti tomum albanum



EM-undanbólkur E: Albania - Føroyar 0-0 (0-0)

Føroyar endaðu hesa EM-undankapping við at vinna eitt stig niðri í Albania. Hóast Albania partar av dystinum hevði bóltin nógv, so var sjáldan vandi á ferð. Hinvegin so megnaðu okkara menn heldur ikki at koma til veruligar møguleikar, hóast vit í fleiri løtum í seinna hálvleiki høvdu bóltin nógv.

Dysturin og avrikið vóru góðkend, men framvegis hava vit ikki skora í sjey dystir.

HB vann 29. steypasigurin

Finalan um løgmanssteypið 2023
B68-HB  0-0 (0-0) (3-5 eftir brotssparkskapping)


Steypasigurin hjá HB gjørdist ikki so lætt vunnin, sum nógv høvdu væntað undan finaluni. B68 gjørdi alt teir kundu og meira afturat fyri at stjala steypið frá HB, og eftir ein málleysan dyst og umdyst vann HB brotssparkskappingina.

Í fyrri hálvleiki var HB annars betra liðið og átti helst at havt avgjørt finaluna. Í seinna hálvleiki var B68 betri við, og hóast HB hevði meira spæl, so var langt millum møguleikarar.

Endin varð, at HB vann. Tað merkir samstundis, at B36 fær seinasta plássið í Evropa næsta ár.

Yvirlivdi flogvanlukku og gjørdist heimsmeistari

Sir Bobby Charlton við HM-steypinum eftir finalusigurin móti Vesturtýsklandi í 1966.
Ein av kendastu ensku fótbóltsleikarum nakrantíð, Sir Bobby Charlton, er deyður 86 ára gamal.

Hann vann heimsmeistaraheitið við Onglandi í 1966 og var sama ár valdur til besta leikara í Evropa, tá ið hann vann Ballon d’Or.

Sir Bobby Charlton spældi sum 18 ára gamal í 1958 sín fyrsta dyst fyri Manchester United og var partur av einum sera lovandi Manchester United-liði, sum vann meistaraheitið bæði í 1956 og 1957. 

Góða gongdin hjá United fekk tó ein bráðan enda, tá ið átta leikarar doyðu í eini flogvanlukku í München í Týsklandi á veg heim frá Evropa Cup dysti móti Reyðu Stjørnu í Jugoslavia.

VÍF víðari fyrstu ferð síðan 1980

Mynd: Andrei Antal
EHF European Cup, 3. umfar
14. oktobur 2023: Handball Esch - VÍF 30-31 (15-17)
15. oktobur 2013: VÍF - Handball Esch 30-28 (16-12)

Menninir hjá VÍF hava spælt seg víðari til triðja umfar í EHF European Cup. Teir vunnu sunnudagin seinna dystin móti Esch úr Luksemborg við 30 málum móti 28.

Tá ið VÍF eisini vann fyrra dystin 31-30, er greitt, at VÍF er víðari.

Ósigrar geva null stig

EM-undandystur, bólkur E
Kekkia - Føroyar 0-1 (0-0)
Hóast Føroyar allan fyrra hálvleik vóru undir einum øgiligum trýsti, og Kekkia rakti stongina tvær ferðir, so eydnaðist at halda tørn í fyrra hálvleiki.

Í seinni hálvleik vóru Føroyar nógv betri við, men tá ið bólturin kom í hondina á Oddmari Færø í egnum brotsteigi, so var brotsspark, sum kekkar settu trygt í málið.

Føroyar megnaðu ikki at svara aftur, og so var enn ein ósigur veruleiki.

Ikki nóg neyvar at basa Íslandi


EM-undandystur í kvinnuhondbólti
Føroyar - Ísland 23-28 (12-11)


Føroyar fylgdu væl við íslendsku grannunum í fyrra hálvleiki, tá ið kvinnulandsliðini í hondbólti hjá londunum báðum møttust høllini á Hálsi.

Serliga verjuparturin var framúr góður, og beint fyri hálvleik kom eisini glið á álopspartin, og støðan í hálvleikinum var 12-11 til Føroyar.

Í seinna hálvleiki fekk Ísland nøsina fram um beinanvegin, og tá ið okkara besti verjuleikari Brynja Høj mátti út við skaða, viknaði verjan nógv, og at endan vann Íslands rímiliga greitt 28-23.

Tá ið risarnir úr Russlandi vitjaðu VÍF

Hugleiðingar um VÍF í Europa Cup

Eftir 24 ára steðg eru menninir hjá VÍF aftur við í evropeiskum hondbólti, og um vikuskiftið spæla teir tveir dystir í Luksemborg móti Esch.

Evropeiska luttøkan hjá VÍF vekir nógv góð minni um spennandi dystirnar í Europa Cup, sum VÍF spældi míni barnaár í 80-árunum.

Enn eitt skuffandi avrik

EM-undandystur, bólkur E, Føroyar - Pólland 0-2 (0-1)

Føroyar komu afturum beinanvegin, eftir at ein bóltur ikki varð ruddaður burtur, og Føroyar megnaðu ongantíð at svara aftur.

Beinanvegin í seinni hálvleiki gjørdist mótbrekkan upp aftur størri, tá ið Hørður Askham fekk reytt kort.

Nú høvdu póllendingar fullkomið tamarhald á støðuni, og tá ið teir gjørdu tað til 2-0, var dysturin endaliga avgjørdur.

Enn eitt skuffandi avrik frá okkara landsliði, sum í løtuni tykist fullkomuliga steðga upp undir Håkani Ericson.

Hondbóltskvinnurnar gjørdu einki við Svøríki


EM-undandystur: Svøríki - Føroyar 37-20 (19-13)

Føroyar fylgdu væl við í fyrra hálvleiki, men beint fyri steðgin fór Svøríki undan og í hálvleikinum var støðan 19-13 til Svøríki.

Í seinna hálvleiki bara økti sera góða svenska landsliðið, og endin var at Svøríki vann 37-20.

Føroyskur toppskjútti var Maria Pállsdóttir við 5 málum.

Ein gandakallur á vølli takkar fyri seg


Mynd: Wikipedia - Ben Sutherland - Flickr
Belgiski stórleikarin Edin Hazard hevur boðað frá, at hann takkar fyri seg sum fótbóltsleikari.

Hann hevði sína bestu tíð sum leikari í enska felagnum Chelsea, og verður mettur millum bestu leikarar, sum hava spælt í bestu ensku deildini seinnu árini.

Hann náddi ongantíð somu hæddum í spanska stórfelagnum Real Madrid, og var nógv plágaður av skaðum seinnu árini.

HB megnaði ikki - B36 legði ikki í

Betri Deildin við monnum: B36 - HB 0-0 (0-0)

B36 hevur framvegis ikki vunnið á grannunum í fleiri harrans ár, HB neyðheldur í triðja plássinum, sum gevur atgongd út í Evropa, og KÍ er upp aftur nærri meistaraheitinum. Tað var avleiðingin av málleysa javnleikinum millum havnarfeløgini B36 og HB í regninum í Gundadali í kvøld.

Sjáldan munnu so fáir áskoðarar hava verið til ein grannadyst í Gundadali, hóast hagtølini siga 1000 áskoðarar, og talan var avgjørt ikki um tann besta grannadystin.

Víkingur um at taka Evropaplássið frá HB

Betri Deildin menn 
HB - Víkingur 0-2 (0-2)
Víkingar vardu væl og vóru effektivir í hinum endanum, meðan avrikið hjá HB enn einaferð var ov spakt av einum oddaliði at vera.

HB hevði spælið í fyrra hálvleiki og hevði onkran hálvan møguleika. Men við tveimum mótálopum, hvør sínu megin hálvan tíma, løgdu Poul Kallsberg og Sølvi Vatnhamar Víking fram um.

Restina av dystinum hevði Víkingur tamarhald á støðuni, og tá ið Tróndur Jensen minkaði um munin í seinasta álopinum í dystinum, var ov seint hjá HB.

HB gjørdi einki við KÍ

Betri Deildin hjá monnum:
HB - KÍ 1-2 (0-0)
Hóast HB var nokk so nær við at hótta Føroya besta lið KÍ, so var HB kortini langt frá at vinna. KÍ prógvaði væl og virðiliga, at teir eru nógv bestir í Føroyum.

Fyrri hálvleikur var javnur við fáum málmøguleikum. Heldur ikki í seinna hálvleiki vóru teir stóru møguleikarnir. Men KÍ legði eitt alsamt størri trýst á verjuna hjá HB, og við einum av mongum hornaspørkum eydnaðist Árna Frederiksberg at senda bóltin beinleiðis í málið.

HB svaraði aftur beinanvegin, tá ið Adrian beindi bóltin í málið. Tað var kortini afturvendi stórskjúttin Páll Klettskarð, sum avgjørdi dystin, tá ið hann beindi bóltin í málið eftir eitt frálíkt álop.

Nógv spæl, men lítið bit í


EM-undandystur, bólkur E, Føroyar - Moldova 0-1 (0-0)
Hóast Føroyar upp á nógvar mátar spældu ein frálíkan dyst, so taptu vit dystin fyri Moldova. Vit høvdu bóltin nógv, og serliga miðvøllurin spældi væl. Hinvegin var álopið ikki serliga vandamikið í kvøld, og sæð burtur frá nøkrum góðum møguleikum fyrstu minuttirnar, so høvdu Føroyar bert hendinga málmøguleika.

Moldova kom fram um nakað inn í seinna hálvleik, eftir at vit høvdu mist bóltin á miðjuni. 

Tíverri megnaðu vit ikki at svara aftur, og Føroyar standa enn við einum stigi í undanbólki E.

Vánaligur seinni hálvleikur kostaði


EM-undandystur, bólkur E, Pólland – Føroyar 2-0 (0-0)

Hóast føroyska landsliðið í ein heilan tíma spældi ein góðan dyst, so endaði dysturin við einum greiðum 2-0 sigri til Pólland.

Føroyar spældu ein góðan fyrra hálvleik, hildu Póllandi frá teimum stóru møguleikunum og høvdu eisini nakrar atsóknir á pólsku hálvuni.

Í seinna hálvleiki var bólturin bara á føroysku hálvuni, og Pólland kom fram um við einum brotssparki frá Lewandowski, og sami Lewandowski gjørdi tað nakrar minuttir seinni til 2-0.

Häcken eitt fet longri enn KÍ

Hóast KÍ sló svensku meistararnar Häcken úr Champions League, so er Häcken komið eitt stig longri í Evropa enn KÍ. Liðið úr Göteborg er nevniliga við í pottinum, tá ið tað verður drigið um bólkarnar í Europa League, meðan KÍ er við í Conference League-pottinum, tá ið bólkarnar skulu finnast seinni í dag.

Øll fýra feløgini, sum KÍ hevur spælt móti í Evropa í summar, eru framvegis við í evropeisku kappingunum hjá UEFA.

Fyrsti felagið, sum KÍ sló úr Champions League, ungarsku meistararnir Ferencváros eru komnir líka langt sum KÍ, og skulu sum føroysku meistararnir spæla bólkaspæl í Conference League.

Molde, sum sló KÍ úr Champions League, megnaði ikki at vinna á turkisku Galatasaray í play-off dystinum um luttøku í bólkaspælinum í Champions League, og er tí við í bólkaspælinum í Evropa League.

Moldovska felagið Sheriff Tiraspol, sum vann á KÍ í gjárkvøldið, tryggjaði sær harvið bólkaspæl í Europa League

Spennandi verður, hvørjum KÍ kemur í bólk saman við, tá ið lutakast verður til bólkaspælið í UEFA Conference League kl. 12.00 í dag, fríggjadag 1. septembur.

KÍ stóð enn einaferð ímóti


Menninir hjá KÍ vísti aftur í gjárkvøldið, at teir hava eitt ótrúligt mótstøðuføri í evropeiskum fótbólti, og kundi tað sama havt vunnið dystin móti Sheriff.

Hóast teir her heima hava víst ávísar veikleikar og ikki hava vunnið tveir seinastu dystirnar, so megnaði KÍ at vera betri enn Sheriff úr Moldova.

Patrick da Silva skallaði KÍ fram um tíðliga í seinna hálvleiki, og KÍ var sera nær við at økja, tá ið málverjin bjargaði einum skallara frá Jákupi Andreasen.

Gestirnir megnaðu síðan at leggja eitt ávíst trýst á KÍ, og javnaðu miðskeiðis í seinna hálvleiki. Eina løtu sá út til, at gestirnir fóru at stjala sigurin. Men KÍ stóð enn einaferð í móti, og alt í alt var KÍ nærri sigrinum enn Sheriff.

Jónas hevði verið nr. 35 í HM

Føroyar hava ikki limaskap í altjóða sambandinum fyri frælsan ítrótt, World Athletics, og tí eru eingir føroyingar við í heimsmeistarakappingini, sum í hesum døgum er í ungarska høvuðsstaðnum Budapest.

Tí gera vit her eina royna at meta um, hvussu okkara fremstu stuttteina rennarar, Jónas Isaksen og Eiri Glerfoss, høvdu kunna staðið seg í HM.

Hallur Holm, ultrarennari og fyrrverandi langteina rennari vísir á Facebook á, at ein av kappingarneytunum, sum Jónas vann á Oyggjaleikunum fyrr í summar, tann hálvi føroyingurin frá Gibraltar, Jessy Franco, er við í HM, meðan Jónas ikki kann verða við, tí Føroyar ikki eru til sum tjóð.

Katastrofal brotssparksdøming og vánaligur seinni hálvleikur


UEFA Conference League - 3. umfar
B36 - Rijeka (Kroatia) 1-3 (1-1)

B36 spældi ein góðan fyrra hálvleik og kom eisini fram um, tá ið Hannis Agnarsson setti bóltin í málið eftir eitt skjótt mótálop. Tíverri loyvdi ein katastrofal brotssparksdøming Rijeka inn í dystin aftur.

Í seinna hálvleiki misti B36 konsentratiónina og var heilt við síðurnar av sær sjálvum. Eitt hav av feilum førdu til, at kroatiska liðið vann 3-1.

Klopp 2.0

Undan kappingarárinum 2023/2024
Tað er bara eitt, sum hevur nakað at siga, nú kappingarárið fer í gongd. Tað er at vinna fyrsta dystin móti Chelsea í London sunnudagin. Ella vit mugu í hvussu er, eftir dystin standa eftir við kensluni av, at Liverpool kom rætt í gongd við kappingarárið 2023/24.

Mannið alt landsliðið við KÍ-arum

Árni skorar sigursmálið við "kalda" høgra beininum

Champions League, 3. undanumfar: KÍ - Molde 2-1 (0-0)
Vit eru eftir hondini vorðin von við at síggja eitt hálvgum reyvasítt landslið spæla á Tórsvølli, og hýrurin á Tórsvølli lyftir seg sjálvan upp um tað, sum nakrir meira og minni fullir fjepparar hjá Skansanum skapa í einum skýmaskoti uttanfyri FSF-húsið.

Í kvøld var øðrvísi. Tórsvøllur var fullsettur við garvillum norðoyingum, og teir høvdu eisini funnið út av seta Bláu bylgju, hornblásarar og trummusláarar mitt á langsíðuna, og KÍ-sangir rungaðu um allan Tórsvøll.

HB fekk ferð á spælið í seinna hálvleiki

Betrideildin menn: HB - AB 5-0 (2-0)
Eftir enn eina skuffandi luttøku í Evropa og higartil eitt nokk so skuffandi kappingarár, spældi HB aftur betrideildar fótbólt í Gundadali í dag. Argjamenn komu heim til Havnar at spæla móti stórfelagnum úr Havn, og eftir góðu gongdina seinastu tíðina var kanska hugsandi, at AB fór at arga HB.

... har pengarnir fólkið flyta

Fótbólturin er undir hóttan av arabiskum pengum, og gloymt tykist fagra prátið um mannarættindi, sum var í sambandi við HM-endaspælið í Katar í desembur í fjør. Í gjár brast bumban, at arabisk feløg royna at keypa fleiri leikarar úr Liverpool. Mitt í øllum rokanum er Jordan Henderson, okkara liðskipari, ímyndin og stríðsmaðurin fyri mannarættindi, líka inntil nú.

Sasha kom ov seint inn

Mynd: Harald Bjørgvin
HM-U21, fjórðingsfinala: Føroyar – Serbia 12-17 (27-30)
Sum so ofta hjá føroyskum ítróttafólkum, so skuffaðu okkara U21-hondbóltsspælarar, nú øll tjóðin var steðgað upp at fylgja við fjórðingsfinaluni í HM-endaspælinum.

Eftir ein vánaligan fyrra hálvleik megnaðu Føroyar við innskifta málverjanum Sasha Lacok á odda at fáa ein ávísan spenning í dystinum. Men vit komu ongantíð nærri enn tvey mál, og Serbia vann at enda 30-27.